(PIDGINCORNER) – Forget Atiku And Buhari Dem Nor Follow, Una Need Me As The President Of Naija -SENIORPIKIN

My country pipo, I hail una completely. Our elders abi na our ancestors talk say if two elephants fight na ground dey sufa am. Now wey we don know who go contest for the two ogbonge political parties APC and PDP for next year presidential election na for us to get our voters cards ready to choose by ourselves, who we want weda na the one wey dey rule us now or the one wey dem dey call Atiku or other ones wey go show face last last or even me His Royal Majesty, High Chief SeniorPikin alias Pimpim wey go finally show and contest again under another party after i lose to Atiku for PDP primaries becos i tink say na free and fair,i nor know say other tins follow, well i try sha na just small 700,000 votes e take pass me..

Well that na by the way side , so as all the people wey wan contest get weytin dem say dem go do if we vote dem in as our president. Some promise say na electricity 24hrs? na today?? some say na job creation,na today? Some even say dem go turn 9ja to Yankee? na today? but for me na just one tin i go do and that tin na to dey give my people wey dey play Nairabet, Betking, Merrybet, Bet9ja and so on 20 sure odds every two two days and i nor go forget all those old palees wey dey play korla i mean pool na 6 naps every weekend, that na my only promise in short na my 1-point agenda wey i fit promise so when you win you go forget NEPA and buy generator, no need for job creation because you don dey win money so you sef don get work . Married people go play and win and and take care of their home and children, even children kpakpa go play too and win to buy sweet and chewing gum, boys no go dey do YAHOO YAHOO or YAHOO plus again unless dem swear for them, boys go win money so that dem go fit take care of their mama and papa and their girlfriends and even girls sef nor go dey do runs dey sleep with their papa or grandpapa age again bcos of money becos dem know say if dem play, dem go win unless na the ones wey Ashawo dey their blood, money go full everywhere love and unity go come back to our country, people nor go dey para or dey vex anyhow Boko Haram people go dey play and win and forget to throw bomb again infact everywhere GO STEW.

The only reason why i wan be president be say i wan bring back all the money with beta profit all wetin bet companies don chop from us from day 1..nothing more,nothing less

My party go be 20 Sure Odds Democratic Party, i know say i go win and Buhari and Atiku know nai make dem dey do everything possible  to frustrate me,but Eledumare stand with me so i stand gidigba but all these things go only dey possible only if i declare say i wan contest and na only two people hands e dey…….

(TO BE CONTINUED)

Please follow and like us:
20

Leave a Reply

Your email address will not be published. Required fields are marked *